Editor Ki Qalam Se… “ALLAH Ko Pyari Hai Qurbani”

 Editor Ki Qalam Se… “ALLAH Ko Pyari Hai Qurbani”

EID-UL-AZHA (QURBANI) KE MUBARAK MAUQE PAR

Readers of Salamevatan,

Assalamu Alaikum Wa Rahmatullahi Wa Barakatuhu

Allah ke rehmo karam se umeed hai ke aap sab khairiyat se honge. Aaj duniya ke halat dekh kar

dil dukhta hai. Shaytan ne khaas taur par hamari Islami societies aur families mein                   

Zati mafadaat, ghalat fehmiyon, hasad, gheebat aur nafsiati dooriyon ke zariye rishton mein karwahat paida kar di hai. Aaj insaan apni ghaltiyon par pachhta raha hai.

Allah Ta’ala ne Farishta Iblees ko ibadat ki wajah se bohot bada mukaam ata farmaya tha, lekin jab Iblees se Hazrat Adam Alaihissalam ko sajda karne ka hukm diya gaya, to usne takabbur ki wajah se

inkar kar diya aur qasam khai ke woh insaan ko behkaega — lalach, chughli, gheebat, hasad,

jalan, ladai, qatl-o-gharat aur dusri buraiyon mein mubtala karke Allah ki rehmat se door karega.

Magar Allah Ta’ala apni makhlooq se bepanah mohabbat karta hai. Allah janta hai ke insaan

kamzor hai, lekin uski rehmat uske gusse par ghalib hai. Hamare Pyare Nabi Prophet

Muhammad (PBUH) ki ummat ke liye Allah ne tauba ka darwaza qayamat tak khula rakha hai.

Agar banda sache dil se, aansuon ke saath Allah se maafi maange, to Allah sirf maaf hi nahin

karta, balki apni rehmat se nawazta bhi hai. Kyunki Allah Rahman bhi hai aur Raheem bhi.

Zara Sochiye… Agar koi jahalat, ghurbat ya majboori ki wajah se ghalti kare to Allah maaf kar deta hai.

Lekin hum par Allah ki kitni azeem naimatein hain:

1. Allah ne hamein sirf insaan hi nahin banaya, balki Pyare Nabi صلى الله عليه وسلم ki ummat mein

Musalman banaya.

2. Hamein sehat, aqal aur behtareen zindagi ata farmayi.

3. Hamein aulaad ki ne’mat di aur unki Islami taleem-o-tarbiyat ki taufeeq bhi di.

4. Hamein rozgar aur izzat ke saath zindagi guzarne ke zariye ata farmaye.

Is liye aaiye, is Mubarak Eid-ul-Azha ke mauqe par Allah se ro-ro kar dua karein:

 Ya Allah! Hamein apni nafarmaaniyon aur gunahon se maaf farma.

 Hamein Shaytan ke behkawon aur shar se mehfooz rakh.

 Ham sab ko sehat-e-kamila, sukoon aur halal khushiyan ata farma.

 Hamare dilon se nafrat, hasad aur dushmani nikal de.

 Ham sab ko ek doosre ko maaf karne ki taufeeq ata farma.

Aaj Eid-al-adha k paak mauke pe meri moaddabana darkhwast hai ke hum sab apni ghaltiyon ko

tasleem karte hue Allah ki raza ke liye ek doosre ko maaf kar dein.

Sabse Badi Qurbani — Ek Doosre Ko Maaf Kar Dena Hai

Allah Ta’ala maaf karne walon se bohot khush hota hai, Allah unhein bhi maaf farma deta hai.

Allah hum sab ki Qurbani, duaon aur nek niyyaton ko qubool farmaye.

Wishing everyone a blessed Eid filled with peace, prosperity, happiness and countless blessings. Eid Mubarak! With bestwishes.....Dr.

Masood Ahmad Editor and Editorial Board